આજના યુવાનો, આવતીકાલના આધારસ્તંભ

મારી નમ્ર વિનંતી છે કે આ બાબતો પર વિચાર કરવામાં આવે।

ચર્ચમાં યુવાનો અને નાનાં બાળકોને પ્રોત્સાહિત કરવું ખૂબ જ જરૂરી છે. યુવાનો માટે સભાઓ યોજવી, ચર્ચમાં તેમને વિવિધ કાર્યો સોંપવા અને તેમને જવાબદાર વ્યક્તિ તરીકે વિકસિત કરવું ખૂબ મહત્વપૂર્ણ બાબત છે. યોગ્ય માર્ગદર્શન અને ઘડતર દ્વારા જ આપણે ભવિષ્ય માટે સારા આગેવાનો, સભ્યો અને સેવકો તૈયાર કરી શકીએ છીએ.

મારા મત પ્રમાણે, કોઈ એક ઘટના અથવા એક ભૂલને આધારે યુવાનો પર તરત જ નિર્ણય કરવો યોગ્ય નથી. દરેક વ્યક્તિને સમજવાની, માર્ગદર્શન આપવાની અને સુધરવાની તક આપવી જરૂરી છે.

એક વૃક્ષનું ઉદાહરણ લઈએ તો, જો તેની યોગ્ય સંભાળ રાખવામાં ન આવે અને તેને સમયસર પાણી ન મળે, તો સમય જતાં તે સૂકાઈ જાય છે. પછી આપણે તેની પાસેથી ફળની અપેક્ષા રાખી શકતા નથી. તેવી જ રીતે, યુવાનો અને નાનાં બાળકો ચર્ચમાં એક વૃક્ષ સમાન છે. જો તેમને યોગ્ય માર્ગદર્શન, પ્રેમ અને પ્રોત્સાહન ન મળે, તો તેઓ ધીમે ધીમે ચર્ચથી દૂર થઈ શકે છે.

આપણે ઘણી વાર સીધું પરિણામ અથવા ફળ જોવા માંગીએ છીએ, પરંતુ એ પણ વિચારવું જોઈએ કે આપણે તેમની માટે કેટલું માર્ગદર્શન અને સંભાળ આપી રહ્યા છીએ. આજના સમયમાં પરિસ્થિતિઓ અને સંજોગોને ધ્યાનમાં લઈએ તો આવતીકાલની પેઢીને તૈયાર કરવી ખૂબ જ જરૂરી છે.

જો આજે યુવાનો અને નાનાં બાળકો પર યોગ્ય ધ્યાન આપવામાં નહીં આવે, તો આવનારો સમય ખૂબ જ મુશ્કેલ બની શકે છે. તેથી સન્ડે સ્કૂલ, યુવાનોની સભાઓ અને તેમની આત્મિક ઉન્નતિ માટે ખાસ ધ્યાન આપવું અત્યંત આવશ્યક છે.

આજના સમયમાં જો આપણે યુવાનોને યોગ્ય માર્ગદર્શન આપી તેમને જોડીને રાખી શકીશું નહીં, તો શક્ય છે કે કોઈ બીજો તેમને પોતાની તરફ આકર્ષી લે. આ એક ખૂબ જ ગંભીર મુદ્દો છે.

યુવાનો જીવનના એવા પડાવમાં હોય છે જ્યાં તેમને માર્ગદર્શન, પ્રેમ અને સમજણની ખૂબ જ જરૂર હોય છે. જો ચર્ચ તરફથી તેમને યોગ્ય ધ્યાન, જવાબદારી અને પ્રોત્સાહન નહીં મળે, તો તેઓ અન્ય જગ્યાએ સહારો શોધી શકે છે.

એટલે ચર્ચની જવાબદારી છે કે યુવાનોને સાથે જોડીને રાખે, તેમને યોગ્ય દિશા આપે અને તેમની અંદરની ક્ષમતાને ઓળખી તેમને સકારાત્મક માર્ગ તરફ આગળ વધવા પ્રોત્સાહિત કરે. કારણ કે આજના યુવાનો જ આવતીકાલના ચર્ચના આધારસ્તંભ છે।

Recent Post

⦿ जहाँ से गिर गए हो, फिर वहीं लौट आओ
⦿ જો માણસ આખું જગત મેળવે, ને પોતાના જીવની હાની પામે, તો ?